Saturday, 7 July 2018

نشرة تكنولوبيا 📰

🌟 شركة أمازون طورت براءة اختراع جديدة لتقنية تحمي طيارات الدرونز اللي هتستخدمها في المستقبل في الدليفري من أن أي هاكر يقدر يسيطر عليها ويخترقها ويتحكم فيها عن بعد! 😎

🌟 انستجرام بيجرب ميزة جديدة خاصة بانك تسأل أسئلة في الستوريز بشكل مكتوب الفولورز يدخلوا يجاوبوا بإنهم يكتبوا اجاباتهم على سؤالك، بس مش واضح الاجابات هتنزل في كومنتات ولا هيبقى ليها شكل معين في الستوري!

🌟 فيسبوك وقف 3 تطبيقات عن العمل!! 👀

متقلقش ولا عينك ترف 😂
التطبيقات دي هي TBH ده ابلكيشن للأسئلة موجه للمراهقين بظبط قريب من فكرة أبلكيشن الصراحة بس الفرق أن ده أسئلته إيجابية مفيهاش نقد، وMoves ده أبلكيشن لياقة ورشاقة وتمارين بيتابع مشيت كام خطوة وحرقت اد ايه في اليوم، وكمان أبلكيشن Hello وده ياسيدي حاجة ما زي تروكولر بيطلع اسم المتصل😎

التالت هيتوقفوا لانخفاض عدد مستخدميهم! 👥

🌟 جوجل أعلنت انها بتخلي بعض المطورين لتطبيقات تانية يقدروا يقروا ايميلاتك على جيميل!! :O

الشركة الأمريكية أكدت انها مبتسمحش لأي مطور يوصل لايميلات أي مستخدم، غلا بعد ما تتأكد من ان طبيعة الأبلكيشن بتاع المطور ده محتاج فعلا انه يشوف الايميلات وكل تفاصيلها بالكلام المكتوب فيها وكل حاجة، وكذلك ده بيحصل بعد ما المستخدم نفسه بيوافق على الموضوع ده، وطبعا من موقعي هذا أحب أقول لجوجل ان موافقة المستخدم بتيجي من انه مش طايق يقرا كل هري سياسات خصوصية البيانات وكذلك شروط الاستخدام والكلام الحمصي اللي مكتوب بطريقة المجلدات، واحب أقولها كمان كلمتين.. اتعظي يا جوجل من اللي حصل لفيسبوك مع كامبريدج أناليتكا ;)

فيه كمان خدمات ايميل تانية بتخلي الموظفين عندها يقروا ايميلات المستخدمين بدون علمهم عشان يطوروا مزايا جديدة زي خدمة الايميل Edison وReturn Path، ولعلمك دول برضو بيشتروا داتا ايميلات الجيميل من جوجل عشان يدربوا أنظمة الذكاء الاصطناعي اللي عندهم عشان يقدموا للمستخدمين ميزة الردود الذكية Smart Replies !

 🌟 الـFBI والـFTC والـSEC دخلوا جديد في التحقيق في موضوع فيسبوك وكامبريدج أناليتكا !

الحروف بالترتيب ( FBI هي هيئة التحقيقات الفيدرالية وFTC هي لجنة التجارة الفيدرالية وSEC هي هيئة الأوراق المالية والبورصات الأمريكية )..

التلاتة بيشككوا ان فيسبوك لسا مخبي حاجات عن تسريب واستخدام بيانات 89 مليون أكونت لمواطنين أمريكيين على فيسبوك من جانب شركة كامبريدج أناليتكا !

(( اقرا القصة الكاملة اللي بدأت في مارس اللي فات من هنا 👈 https://goo.gl/wkqQDR ))

🌟 مستخدمين كتير لموبايلات سامسونج - منهم ناس معاها جلاكسي S9 - اشتكوا من ان فيه حاجة غريبة حصلت وهي ان أبلكيشن سامسونج بتاع الرسايل بعت صور من الجاليري على موبايلهم لأرقام متخزنة على موبايلاتهم بدون اذنهم!!

الغريب ان معظم اللي اشتكون من المشكلة مشتركين في خدمة شبكة الموبايل مع شركة T-Mobile، واللي طلعت قالت ان المشكلة دي مشكلة سامسونج مش مشكلتها، وسامسونج قالت انها بتدور في المشكلة عشان تعرف السبب فين!

🌟 فيسبوك بيجرب حاليا ميزة جديدة وهي Do Not Disturb على أبلكيشن الفيسبوك، واللي هتخليك تقدر توقف وصول أي نوتيفيكيشنز جوا الأبلكيشن!

🌟 هواوي سجلت براءة اختراع جديدة لساعة ذكية ممكن تشيل في نهاية الأوستيك بتاعها سماعات وايرلس :O

صباحكم فُل 😄

شارك المقال

No comments:

جميع الحقوق محفوظة لـ X ANDROID | تصميم: X ANDROID