Saturday, 7 July 2018

اخبار التقنية اليوم

#نشرة اليوم📰

🌟 أوبر في مناقشات مع شركة كريم بخصوص صفقة دمج 😱💰

الصفقة مفيش تفاصيل كتير عنها، بس المصادر اللي اتكلمت مع وكالة الاخبار بلومبرج بتقول أن أوبر هيبقى ليها نصيب الأسد من الشركة الجديدة، بس مديرين كريم هم اللي هيمسكوها إداريا 😎

🌟 من كام يوم مساعد أبل Siri عمل حركة عجيبة جدا و هي انها لما اتسألت عن عمر كاتب قصص مصورة اسمه ستان لي بتقول أنه مات يوم 2 يوليو 2018 🙈

والراجل ده مماتش ولا حاجة، إنما واحد لذيذ عمل تعديل في صفحة ويكيبيديا بتاعته وأضاف تاريخ وفاته، وسيري بتعتمد على ويكيبيديا بشكل كبير عشان تجيبلك معلومات وترد على أسئلتك!

🌟 الجيش الأمريكي هيتعاون شركة إنتل عشان يعملوا عرض أضواء بطيارات الدرونز في السما ويكونوا علم أمريكا 🇺🇸 بمناسبة يوم الاستقلال 4 يوليو!

🌟 الفيسبوك مبيستخدمش ميكروفون موبايلك.. خلاص خلصانة😎

مجموعة باحثين من جامعة Northern University أعلنوا أنهم عملوا تجربة على 17 ألف أبلكيشن من أشهر أبلكيشنز الموبايلات منها مملكة الفيسبوك كلها واكتشفوا أن مفيش اي أبلكيشن بيستخدم الميكروفون من موبايلك بدون علمك، بس فيه منهم بيسجل اللي بيحصل على شاشة موبايلك فيديو وبيبيعوا اللي بيسجلوه ده لشركات الطرف التالت!

🌟 الدول الأوروبية بسبب مشاكل المهاجرين غير الشرعيين اتفقوا على استخدام أنظمة إلكترونية وتطبيقات كتيرة عشان يقدروا يفتشوا موبايلات المهاجرين وسلموا تشفير كل حاجة على الموبايل حتى الواتساب عشان يتأكدوا من البيانات اللي بيكتبها المهاجرين في استمارات الهجرة على الحدود!!

🌟 مجموعة هاكرز طوروا فيروس ممكن تعتبره الاصيع على الاطلاق والله 😍😎

الفيروس ياسيدي بيستهدف أجهزة المستخدمين اللي بيتعاملوا في تجارة العملات المشفرة زي البيتكوين، بحيث أن الفيروس بيستهدف جزء معين في أجهزة الكمبيوتر اللي شغالة بالويندوز، وهي ClipBoard، وده جزء يا معلم بيتخزن فيه أي حاجة بتعملها Copy وخصوصا الكلام النصي، وباعتبار أن اللي معاه محفظة إلكترونية شايل فيها العملات الإلكترونية بتاعته، عمره ما هيحفظ عنوان المحفظة اللي بيتغير مع كل عمليادة شراء لو بيع، عشان كدا دائما بيتاخد كوبي وبيست.. لقطتها؟ 🤔

الفيروس بيدخل على الكليبورد على الكمبيوتر واول ما تاخد انت عنوان محفظتك الحقيقي كوبي، هوووب يدخل الكليبورد، هوووب الفيروس يغير العنوان الحقيقي بعنوان محفظة الهاكرز، هوووب تيجي تعمل بيست ينزل عنوان محفظة الهاكر وانت ولا هتاخد بالك، وكدا بالشفا يامعلم اتسرقت💪

2.3 مليون محفظة اتسرقوا بنفس الطريقة!

🌟 ثغرة اسمها Download Bomb أصابت كل البراوزرات حاليا من كروم واوبرا وفايرفوكس وBrave وVilvadi ودي عبارة عن ثغرة بتخلي البراوزر بتاعك يهنح في  صفحة موقع معينة لما تعمل داونلود لفايل معين!

الغريب أن دي ثغرة قديمة كانت اتقفلت في كروم 65، العجيب بقى ان انفتحت تاني لما نزل كروم 67 😂

🌟 تقارير جديدة بتأكد ان سامسونج شغالة دلوقتي على تطوير بطارية قابلة للطي عشان تمد الموبايلات القابلة للطي Foldable smartphone بالطاقة😍 التقرير بيتكلم أن البطاريات دي هتتراوح سعتها بين 3000 مللي أمبير و6000 مللي أمبير 🔋

🌟 قلم سامسونج الذكي S Pen بتاع أجهزة النوت احتمال ينزل قريب ببلوتوث😍

طبعا كل أجهزة النوت القيمة كان فيها قلم بس كان شغال بفكرة الكتابة على الشاشة بتقنية Electricity Induction بحيث أن سن القلم يحرك بعض المستشعرات الكهربية المنتشرة تحت سطح الشاشة فساعتها هتحس الشاشة بحركة القلم..

إنما فكرة أن القلم يجي ببلوتوث ده هيفتح إمكانية انك تستخدم القلم مع الموبايل عن بعد زي انك تشغل وتطفي المزيكا وتعلي وتوطي الصوت، ده غير طبعا انك ممكن تكتب على أي سطح، والقلب م ينقل حركة ايدك بالقلم للموبايل تتخزن عليه، فممكن تكتب على ورقة بيضا، وهوب كل اللي تكتبه يترسم أو يتكتب على موبايلك بسهولة، بدون ما تلمس موبايلك اصلا😱

🌟 وزير الدفاع البريطاني جافين ويليامسون اتحط في موقف محرج وهو في جلسة لمجلس النواب البريطاني بيناقشوا الواسع في سوريا، أصل ويليامسون لما اتكلم وقال "Syria"، اتفاجيء بموبايل بيطلع صوت.. اتاريها Siri اشتغلت لان موبايله الآيفون سمعها "سيري" مش "سيريا" 😂

صباحكم فُل 😄

شارك المقال

No comments:

جميع الحقوق محفوظة لـ X ANDROID | تصميم: X ANDROID